Метадалагічная школа магістраў гульні ў Лятучым універсітэце

Администратор сайта | 21.11.2015

Лятучы ўніверсітэт абвясціў адукацыйную праграму 2015-2016 года. Яна адметная з’яўленнем дадатковай ступені ў структуры адукацыі Лятучага — школ магістраў гульні. У іх ліку — Метадалагічная школа.

У межах гэтай школы беларуская метадалагічная супольнасць прапануе інавацыйны падыход да адукацыі. Мы арыентуемся не на прафесіі, дысцыпліны ці тэмы, а на фармаванне адмысловай формы мыслення, дзеяння і ладу жыцця — «Homo ludens» («Чалавека гуляючага»).

«Чалавек гуляючы» — гэта нашае бачанне антрапалагічнай перспектывы сучаснага чалавека, якая скіравана на асваенне мыслення для гуманітарнай практыкі ва ўмовах множнасці сусветаў. Мы запрашаем удзельнікаў падчас навучання адкрыць у сабе «Homo ludens» праз супольнае засваенне метадаў, падыходаў і практыкі самаарганізацыі і самавызначэння.

У праграму школы ўваходзяць:

• засваенне базавых метадаў і падыходаў метадалагічнай працы (анталагічная праца, схематэхніка, рэфлексія і праблематызацыя, праграмаванне, гульняпрактыка);
• праца з асабістай адукацыйнай і кар’ернай траекторыяй;
• самавызначэнне і арганізацыя асабістай і супольнай дзейнасці, арыентаванай на Беларусь (даследаванні, праекты і г.д.);
• асваенне разнастайных форм актуальнага беларускага мыслення «тут і цяпер»;
• арганізацыя і ўдзел ва Універсітэцкай гульні;
• удзел у клубнай прасторы метадалагічнай супольнасці.

Кіраўнікі школы: Уладзімір Мацкевіч і Таццяна Вадалажская.

У працы школы таксама возьмуць удзел іншыя чальцы метадалагічнай супольнасці: Андрэй Ягораў, Аксана Шэлест, Зміцер Галіноўскі і інш.

У адукацыйны працэс у школе будуць уключаныя заняткі з удзелам мысляроў з Калегіума Лятучага ўніверсітэта: Ігара Бабкова, Міхаіла Баярына, Міхала Анемпадыстава, Генадзя Сагановіча, Валянціна Акудовіча, Мікалая Лявонава і інш.

У школу запрашаюцца тыя, хто:

• мае і вольны час, і лад жыцця, неабходный для мыслення;
• мае амбіцыі па сістэмных пераўтварэннях грамадства і гатовы да «гульні ў Беларусь»;
• шукае адказаў на падставовыя пытанні і гатовы да радыкальных змен у сабе: светапоглядзе, метадах, ладзе жыцця.

Школа разлічана на два з паловай універсітэцкія гады. Пачатак — у студзені 2016 года, заканчэнне — у травені 2018 года.

Каб трапіць у Метадалагічную школу, неабходна да 5 снежня 2015 года падаць заяўку (запоўніць анкету і даслаць матывацыйны ліст) па спасылцы ніжэй. Зарэгістраваныя кандыдаты будуць у далейшым запрошаны да сумоўя.

Удзельнікам будуць дасланыя тэмы для сумоўя (5-7 тэм па актуальных пытаннях, якія вымагаюць мыслення «тут і цяпер»), па адной з якіх (па выбары кандыдата) будзе ісці размова.

Падаць заяўку на паступленне ў Метадалагічную школу магістраў гульні

 

Гл. больш падрабязнасцей:

• Татьяна Водолажская: Игра — это более чем серьезно (Інтэрв’ю напярэдадні адкрытай лекцыі);
• Таццяна Вадалажская: Што ёсць гульня? (Відэазапіс адкрытай лекцыі);

Прэзентацыя адукацыйнай праграмы Лятучага ўніверсітэта 2015-2016 года: