3 лістапада — прэзентацыя новай адукацыйнай праграмы Лятучага ўніверсітэта

Администратор сайта | 10.11.2015

13 лістапада 2015 года ў Мінску пройдзе публічная прэзентацыя новай адукацыйнай праграмы Лятучага ўніверсітэта.

Рабі нечаканае,

Рабі, як не бывае,

Рабі, як не робіць ніхто, —

І тады пераможаш.

Уладзімір Караткевіч

Тыя, хто знаёмы з Лятучым універсітэтам не толькі з разавых мерапрыемстваў, ведаюць, што ўвесь час свайго існавання (а гэта больш за 5 гадоў!), наш універсітэт знаходзіцца ў сталым пошуку новых форм і спосабаў арганізацыі мысленчай працы, новага зместу адукацыі — найбольш адпаведнага ідэі сучаснага Універсітэта. Менавіта таму кожная наступная праграма, якую абвяшчае Лятучы ўніверсітэт, не падобная на папярэднюю: захоўваючы добрыя ўніверсітэцкія традыцыі, мы заўсёды здзівім слухачоў і нечаканымі інавацыямі.

Новая праграма прадстаўляе два розныя ўзроўні адукацыі.

Для тых, хто хацеў бы выбудоўваць асабістую адукацыйную траекторыю ў вольным руху, Лятучы ўніверсітэт прапануе ўжо добра знаёмы традыцыйны фармат — адукацыйныя курсы. Гэты т.зв.«першы ўзровень» новай праграмы складаюць 8 курсаў, на якіх свае падыходы і практыкі мыслення прадставяць вядомыя беларускія інтэлектуалы і культурныя дзеячы: Уладзімір Мацкевіч, Міхал Анемпадыстаў, Ірына Дубянецкая, Генадзь Сагановіч, Міхаіл Баярын, Ігар Бабкоў, Павел Баркоўскі, Вячаслаў Бабровіч.

«Другі ўзровень», і яму надаецца асаблівая ўвага, прадставяць школы магістраў гульні — новы адукацыйны фармат Лятучага ўніверсітэта. Разлічаныя на невялікія групы адмыслоўцаў, шчыльную камунікацыю з настаўнікамі — вядомымі беларускімі інтэлектуаламі і мыслярамі, — школы задуманыя як месцы супольнай працы па стварэнні новых сэнсаў і практык:

• Школа гісторыі ідэй (кіраўнік — Ігар Бабкоў);
• Метадалагічная школа (кіраўнікі — Уладзімір Мацкевіч і Тацяна Вадалажская);
• Школа ВКЛ (кіраўнік — Алег Дзярновіч);
• Школа сацыяльна-філасофскай аналітыкі (арганізатары — супольнасць «Беларускай філасофскай прасторы»).

Чым адметныя гэтыя два ўзроўні? Па якіх прынцыпах збудаваныя, якія крытэрыі адбору, патрабаванні і ўмовы ўдзелу? Што чакае слухачоў у выніку — якія здабыткі? Хто такі «магістар гульні» і каму будзе надавацца гэтая ступень у Лятучым універсітэце?

Каб падрабязна даведацца пра канцэпцыю і структуру новай праграмы, пазнаёміцца з асновамі, прынцыпамі, зместам лекцыйных курсаў і школ магістраў гульні, адчуць цудоўную атмасферу інтэлектуальнага асяроддзя, у неафіцыйнай абстаноўцы пагутарыць з выкладчыкамі курсаў і кіраўнікамі школ —

запрашаем на прэзентацыю новай праграмы Лятучага ўніверсітэта, якая адбудзецца 13 лістапада, у пятніцу, у клубе «Imaguru» (Мінск, вул. Фабрыцыюса, 4). Пачатак у 18.30. Уваход вольны!

Звяртаем увагу, што запіс на курсы і ў школы ўжо адкрыты і трывае да 5 снежня 2015 года!

Пазнаёміцца з кароткімі анонсамі курсаў і школ, а таксама зарэгістравацца на іх можна на сайцеЛятучага ўніверсітэта.